迷失香江

很久無寫文章了，明天便是奧運開幕，但我並不是講奧運，呢個奧運無咩好講，純粹是中國向外宣示國威的儀式。如無意外，中國將會得到最多金牌，一定會攞埋個尾彩。

我想講係香港政府的政治前景真係非常大劑，之前副局長事件，之後外傭稅事件，再加埋今次梁展文事件，真係一鑊大劑過一鑊。曾特首今次真係神仙難救，我睇佢都真係時日無多，估唔到佢走得重快過老董。唔係領袖材料就唔係領袖材料，自視過高，心胸狹窄，記仇，用人不為才，EQ低。佢自己無錯係一個執行命令嘅人才，但係無做領袖的能力。就好像西楚霸王一樣，有個人能力，但無統令天下的天份。

問題係曾特首下台之後，有邊個可以接棒，繼承佢嘅位置。橫顧香港政壇，真係無乜邊個看似人君。唐英年大唔透，講野唔經大腦，不成大器。曾俊華無大作為，又唔係中方所屬，無力繼承大統。梁振英狼子野心，路人皆見，不成氣候。還有甚麼人選可以考累呢？香港呢十年都係無咩寸進，全靠阿爺打救，再無個似樣嘅領導人，香港好快就會被上海追過，當上海成為中國最大金融中心，香港仲可以依靠咩野立足。

睇見香港攪到如此景況，真係令人搖頭嘆息。