我對數市的看法

這今年最篇是後一篇文章，今日無乜大新聞，但我睇到一篇關於數市的報導，講到至今為止樓市平均升了２０％，下年更全面看好。

在負利率的效應下，今年樓市全面看升，樓市一面看好，香港的經紀生意好到好似９７果陣。但是如果現在想買樓長住的話，我就不建議入市了。你可能會話，樓市上升唔入市，唔通樓市跌先至入市咩？無錯，如果你諗住自住的話，我不建議你高追，除非你係用作炒賣則另計。

從來經濟都有週期的，樓市一樣唔例外，現在正處於樓市上升週期中，如果你買嚟炒賣，現在買入ｔｉｍｉｎｇ正確，買個特色單位，幾個月就有收成，但係要買嚟自住就要忍忍手了。一般人買樓都要做按揭貸款，一供就係廿年到三十年時間，買貴２０％就起馬要供多幾年；同樓市通常５－７年一個週期，由０３年樓市復穌到現在０７年有四年時間，樓市估計尚有２到３年牛市。如果供一層樓要廿年時間，我們何不等２到３年，到時樓市急轉直下，才入市買平貨呢？要知到買平２到３成樓價，起馬供少幾年按揭，又唔洗同人爭貴樓，真係一舉數得。

不過以上純粹個人見解，買樓係一個大決定，請自行分析和理解。

民主派學學貝娜齊爾

今日睇新聞，巴基斯坦反對派領袖貝娜齊爾遇刺身亡，享年５４歲。

布托家族一生為巴基斯坦民主作出貢獻，貝娜齊爾父親布托為第一任民選總理，而被軍人推返，再被暗中殺死，而他的兩個弟弟也被暗殺。貝娜齊爾一生活在流亡和政治中生活，當過兩界巴國總理，兩次比巫告貪污下台，流亡海外。今年十月才由外國返回祖國，第一次正式政治集會，說出冒着生命危險返國，之後就被刺殺身亡。

民主係要犧牲的，歷來大多數國家都要用鮮血做代價，換取民主治國。你們香港這班民主派，除了識做下ｓｈｏｗ，喊下口號遊下行，抽下油水之外，有咩野犧牲過呀？個長毛做咗議員之後，連做ｓｈｏｗ都遲到，又話堅決反對遲於２０１２年普選。有無真正心平氣和，和中央和平談判呀。基本法寫明普選決定權在中央，你憑咩野堅決反對呀。有本事就親自上京請願，而唔係叫個二打六上京做場ｓｈｏｗ。民主派真係越來越令我反感，下年立法會選舉，我真係唔會選呢班咁嘅人。

貝娜齊爾講過，『不是她選擇這種生活，是命運選擇她過這種生活。』過句說話，我很有共鳴。

泛民主派玩罷工

近排太少ｕｐｄａｔｅ個ｂｌｏｇ了，比我啲ｂｌｏｇ嘅讀者投訴話要罷睇（其實只得兩個）。我為咗奪回買少見少嘅讀者嘅芳心，今日點都要死篇文嚟回饋讀者。

呢兩日睇新聞，都無咩野大新聞，最特別都係打撈古船《南海一號》，成千年隻船浸係海都唔爛的確係一件奇蹟，不過有無必要整個水晶宮嚟珍藏嘅隻沉船就值得商確。究竟有無咁多人有興趣參觀呢隻沉船的確係一個疑問，不過商業價值一定唔夠拍賣嘅價值。不過紀念和考古價值就可能係無價，不過我係一個市儈粗人，我就唔識分值唔值了。

而比較有趣嘅新聞就係泛民又話中央唔蘇佢地，要攪遊行，罷工，絕食。就連中學生都知權在中央，我地只不過係中國大陸一個城市，人地肯同你傾已經比面你啦，重要堅持２０１２年普選，邊個都知到唔會有可能啦。無人睬你就玩絕食，遊行發爛渣，仲話要玩罷工添。你估有無人會理你呀。唔好話民主派已經失勢，就算當年你好景果陣，叫到５０萬人示威，都唔會有人睬你去罷工啦，你估個個都好似你地咁食政治飯呀，手停口停呀大哥！叫人地唔食飯嚟做你地嘅政治籌碼呀，唔好咁痴線啦。你班民主派做野再係咁唔經大腦，小心下年立法會選舉嘅議席都輪埋呀。至於要絕食，要遊行隨得你，不過要搵定下台階，唔係到時人地當你無到都唔會咁瘀嘛。

Merry Christmas

聖誕節係一個普天同慶的日子，祝各位聖誕快樂，新年進步。

男子組

今日經過球場見到一班三字頭踢波，我重聽到佢地話要蓄錢生仔添。睇返自己，其實我都三字頭了，呢ｄ事會唔會離我越來越近呢？但係我好似同呢ｄ事情脫晒節咁嘅。

命運弄人

比網友指我近排少寫blog，的確近排寫少咗，一來懶，二來無人回響，少咗原動力。

網友又指我好少寫生活近況，無錯我比較喜歡寫時事經濟，因為我的生活太乏善可陳，無咩野值得分享，希望我將來的生活更多姿多彩，可以和大家分享一下。

今日想講下“建築有情天”呢套電視劇，呢套劇大概係講一個中年建築師離開建築界１３年，被迫再入行的辛酸事蹟和兩個女人之間的感情故事。呢套劇令我好深刻的一幕係當佢再入返則師樓的時候，發覺自己與時代脫節，再也不復當年勇的時侯。一個原本才華揚溢的建築師，因比時間際遇的娛弄，變成一個只求安逸的裝修佬。時間和曲折的際遇真的消磨人心，幾多剛畢業志氣高昂的年青人，最後變成一個隋波逐流的小男人。又有幾多人有劇集中方中信的恩師，帶他重回當天的理想呢？命運真是作弄人。

陳方安生勝出

立法會港島議席補選，經過三個多月的爭議，陳太終於有驚無險地勝出。

雖然只有一年任期，實際意義不大，但象徵的意義重大。陳太代表港人對民主的要求，而葉太代表對中央的順從。理論上差不多大部人都想要民主，為何３０萬投了票的選民，只有１７萬人投票給陳太咁少，不是理應有九成人會為民主投票嗎？真的可以為了金錢利益，而放棄了自主權嗎？

中共是一個極權社會，而中國歷史從來都無民主的成份，從來都是家天下。所似當政權出現一個昏庸的統治者，平民就會苦不堪言；去到極點時就會官迫民反，引發革命，用鮮血建立另一個新政權。極度權力，極度腐敗。而民主制度正可制衡極權的施行，令權力掌握者的野心受到控制。令到不稱職統治者，可以由人民用選票拉他下台，不用用到血腥的戰爭來改變政權。

所以為了利益而放棄自主權是非常愚蠢的一會事，為何港人會為了中共的有利政策而變成順民呢？當自主權失去了的時候，再後悔已經大遲了。

斑馬在線 : 打工仔如何做好這份工

斑馬在線呢個節目真係幾益智，真係成年人必睇節目之一。

又到立法會補選

區議會選舉曲終人散，結果塵埃落定，泛民主派完全落敗，民建聯大獲全勝。點解民主派會輸得咁慘，一來上次大勝之後無做好地區工作；二來無民建聯咁財雄勢大，有錢養一班非區議員全職做地區工作，令佢地有地區工作往績，這是其他新挑戰人士力有不及。好似我選區個獨立民主競選人，全個選舉日得一個人係到拉票，而另一個民建聯現任議員則周圍都係宣傳海報，幾廿人幫佢拉票，真係高下立見，結果果個現任區議員２千多票勝出，獨立民主人士只得３百來票。你話有資源財力效果差幾遠呢。

今日收到立法會補選宣轉單張，有八個候選人，六個擺明係博出位博宣傳，得兩個係有機會競爭。我就一定選陳太㗎啦，雖然陳太唔係表現得好好，不過我覺得佢追求普選嘅真實性比葉劉好好多。葉劉ｄ戲又屎，又ＥＱ其低，對廿三條立法一ｄ悔意都無，真係用支槍指住我，我都唔會投票比佢。

區議會選舉

１１月１８日就係區議會選舉日，我果區得兩個候選人，一個係做咗十幾廿年嘅民建聯嘅區議員（唔記得乜名），另一個係泛民主派嘅新人（呢個直頭唔識）。

舊果個除咗識攪ｄ蛇宴和旅行團冧ｄ老街坊，都唔知佢咁多年做過咩。另外果個唔知係乜水，真係唔知點選，想話做下公民責任都唔得。或者算個新人，睇下會唔會有新變化；不過睇怕都係個老議員當選，因為佢有好多鐵票。

反而立法會補選我就會選陳方安生，好過個死唔認錯，又要扮悔改嘅葉劉多多聲。

張永霖 - 成功路

昨日買了張永霖的成功路看了四份三的內容，發覺這本書有很多潤色成份。

例如他說中七高考地理課貼題目，貼不中題，但可以運用機智，亂作答案，竟然得到優異成績，令他可以升讀大學。他由國泰轉工到香港電訊時，剛巧副主席去世，令到他由香港區第二把交椅，變成第一把交椅。

基本上除了他在學生時期比懶散和失戀外，全書他都一帆風順，次次都能化險為宜，全沒有經歷錯折，人生真係咁美滿？

不過書中也有很多肺腑之言和人生哲理，很值得讀者一一細看，特別是初出社會做事的年輕人。

阿里巴巴起個孖！！

今日特登睇財經新聞，睇下阿里巴巴變成點，點知佢重勁過哈利波特ｄ法術，升成兩倍咁多。

一開市升到３０蚊，都已經犀利啦，點知越升越有，臨尾升到３９蚊到，成交有成１７３億。

ｄ升戶一開市即刻出貨，攪到電話都打唔通，個個驚死出貨出唔切，夠警係邊個咁勇接ｄ貨呢？唔通有人慧眼識英雄，３００倍ＰＥ都覺得抵買？？

阿里巴巴市值已經超過２０００億，已經超過香港股神四叔的旗艦恆基地產的１２１９億差唔多一倍。做網真係咁好賺，可以一日市值高過四叔一世人嘅成果？

越來越覺得似２０００年果陣，當年李澤楷嘅盈科數碼動力市值高過長實嘅市值，比傳媒話小小超一單ｄｅａｌ，已經超成李超人一生嘅成就，現在變成點呢？

當年盈科同電迅合併完畢後，科網股泡沫就爆破，咁呢個中資股泡沫又會點呢？

利物浦又再令我失望

睇完利物浦對比錫達斯果場比賽，利物浦嘅表現真係切底令我失望。

輸波唔係令我最失望，最失望就係踢埋ｄ低級足球。對住隊同組弱旅，竟然踢埋ｄ高Ｑ大腳嘅低級足球，淨係識大腳斬個波去禁區比ｄ前鋒去頂去撞，完全唔識咩野叫做組織埋門。

球員又唔係唔夠質數，你對強隊踢高球我唔怪你，你可能怕會失位輸波。但對住隊歐聯弱旅，你比返小小強隊本色我睇下得唔得？輸唔緊要，輸都要輸得好好睇睇啦。

賓尼迪斯！我等咗你交成績等咗四年啦，你再係踢ｄ咁嘅波比我睇，我真係覺得要換領隊了。

阿里巴巴

好耐無寫blog了，今日就寫返篇啦。

阿里巴巴招股，原本我都諗住博大霧，抽返手當買彩票。點知佢貪得無厭，臨尾都要加價成１２％。值頭搶錢咁，攪到ＰＥ過一百倍，試問仲邊有水位賺，我都係慳返ｄ心機好過。

老實講，ｄ人問我阿里巴巴抽唔抽得過，襯而家牛氣沖天，當抽奬就抽得過，買嚟長渣就真係要計計數啦。

阿里巴巴我無記錯應該係係科網股果陣誕生，間公司成立咗７年，有２千幾萬用戶，睇落好似好吸引，而且仲有１３億人口嘅衝景。但係睇返佢嘅比錢用戶，得１％咁大把，大概得廿萬到。即係用成７年時間，先得一個巴先用戶肯比錢，仲要係客戶增長開始放緩，你話死唔死。

而有前境嘅其他服務，淘寶網，支付寶，雅虎中國，同阿里軟件，一個都無擺係新公司到。好野就留番自己，無前竟嘅業務就高價招售。

而ｂ２ｂ業務都開始有競爭者，ｇｌｏｂａｌ　ｓｏｕｒｃｅ都好似有意分一杯匙。

而今次招股有７０％係賣舊股，即係ｃａｐ水多過集資，都唔知係咪搵老襯。

阿里巴巴與四十大盜，係一千零一夜裏面阿里巴巴係偷四十大盜嘅寶藏嘅。抽唔抽阿里巴巴真係你諗你啦。

尋找他鄉的世界出發

呢班仔，真係拍得好攪笑。

黃子華 - 奸人堅語錄

大家有無睇《奸人堅》呀，真係幾得㗎。

遊戲又開始了

今天股市先升後跌，睇怕又開始玩尋頂時間，到達頂峰後，就到股災遊戲了。

股蟻們，你地比心機玩你地嘅遊戲吧！盡量玩得開心點，股市會記住你們的所作所為，到達股市盡頭的時候，市場先生會對你們的貪得無厭而作出懲罰，你們要對你們的行為負責，一個不留。

陳奕迅-猜情尋

人生就像一場遊戲，有人玩得出色，也有人玩到想喊，不管怎樣也是一場夢。不管贏了輸了，也不用太認真吧！

令人失望的利物浦

睇完利物浦歐聯對馬賽的那場波，加埋今場英超對熱刺，真係睇到把幾火。

季初仲諗住今年英超冠軍有望，但睇完呢兩場比賽，真係令人切底失望。成隊波打到毫無組織，淨係識右邊出波或斬去禁區口，但係成隊波又無邊個頂得之人，最頂得係希比亞，但係佢係後防中。一係就龍門連拿大腳斬比托利斯跑狗博單刀，完全係無組織到攻勢。隊長謝拉特好明顯鬥心係夠，但係就無乜組織攻勢嘅天分。但中場中沙比艾朗素又傷咗，馬斯卓蘭盧又只係防守中場，防守有如，攻力不足，好應該神早出班拿約，同巴布組織攻勢。對熱刺呢場波等到６０分鐘先出佢地，唔通主場想博和咩，神早輸１：２就即刻出佢地啦，我都唔明領隊賓尼迪斯點諗。佢教隊波再係教成咁，雖然我都對佢幾有好感，但係隊波再係踢成咁，我都建議換領隊，唔可以再踢呢ｄ垃圾波。

還有利記輸兩球波都係希比亞頂輸比貝碧托夫，好明顯希比亞已經嚴重退化，１月轉會市場重開，急切搵一個中堅做後備，否則後果嚴重。

詹瑞文@墨斗先生

今日真係黑，做樣樣野都唔順利，睇怕都要好好檢討一下平時的小習慣，睇下有無得改善下。

超合金魂

呢首歌我係其他blogger嘅blog睇番嚟，各得很有趣，和大家一齊分享下

緬甸大屠殺

司馬遷在二千一百年前講過一句說話『天下熙熙，皆為利來；天下攘攘，皆為利往！』

緬甸軍政府終於忍唔到僧侶示威，開始所有獨裁政權最叻的血醒震壓。平民僧侶們上街示威，我想都唔係天真到似為軍政府會大發慈悲，會比你感動到，比你地民主自治，送回統治權給平民。而係希望其他世界國家見到佢地對抗極權統治的素求，伸出援手，為佢地爭取民主，逃離軍人統治。

可惜你地無石油，如果唔係，美帝一早揮軍直下，幫你地攪民主自治，順便同你分下身家啦。依家淨係譴責緬甸政府嘅暴行，得個講字，小小制裁行動都無，唔好話派遣軍隊支援啦。安理會重衰，只係密切留意，連譴責都慳番。

緬甸人民們，你地都係唔好指意其他國家會伸出緩手啦，都係靠自己啦。但係手無寸鐵嘅平民，點同武裝軍人鬥？我就真係唔知啦，祝你們好運啦，我精神上會支持你們。

伊朗總統美國演講

伊朗總統艾哈邁迪內賈德到美國出值聯合國大會，美國擺到明列佢為頭號敵人，佢重夠膽去人地國家踩場，原本我都佩服他的勇氣，真係有一國總統的風範。但他竟然接受哥倫比亞大學邀請去演講，就真係愚蠢到無人有，比人娛弄就真係疚由自取。

你去人敵國開會，人地為咗保護名聲，雖然唔歡迎你，但都一定會保你週全，以示一個大國的風度。你本來可以顯示你一個回教勇士的勇氣，又可以落一落美帝的面子，真係一舉兩得。

點知你愚蠢到去人地美國大學演講，大學係言論最自由，真多激進份子的地方。佢地想講咩就講咩，更本唔會專重你係一國之首，況且係敵國總統。你估係你地伊朗地頭咩，邊有人會比面你。哥大邀請你更本係一個陷阱，就係要你係大眾面前出醜，無論你幾好口才，都難敵由由眾口，況且人地都未必會比機會你自辯。真係唔知邊個蠢才智囊，叫你去送死。

艾哈邁迪內賈德你係醒目嘅話，就唔好再做咁多無謂野，做埋個聯合國show，即刻番伊朗，到時你要講咩吹咩，邊個奈得你可呀，到時唔好話做核彈，做人造衛星都無人吹得你帳啦。

《西遊記一百零一回之月光寶盒》- 時光倒流

如果可以時光倒流就好了。

又大一歲了

剛剛過咗我嘅生日，又過一年了，回顧過去前半生，乜野都無做過，真係揭然一身，兼夾兩袖清風。浪費了很多時間，亦都虛渡了許多時光，到現在仍然深深不奮。

尚且慶幸我都無做過虧心事，對得住天地良心，行雷閃電都唔怕出街，都算係一個堂堂正正的人。

之後嘅日子會點我唔知，就算明日我兩腳一伸，駕鶴仙遊，我都唔會有怨言。我一出身赤條條的嚟到呢個世上，呢個世界無欠我，我亦都無欠呢個世界。

明日嘅日子又係咁過，不過我嘅生日願望就無實現到，唯有寄望明年了。

《西遊記大結局之仙履奇緣》經典對白

聯儲局減息半厘！！

伯南克真係大幅減息，股市想唔升到半天高都難了！

雖然減息有利股市，但對通帳就大大不利。美國的CPI已經開始回升，石油重上80美元一桶的水平；金價又去到700美元一ounce的高位，美金又弱過藥材鋪，而家重要減息成半厘咁多，真係唔知伯南克點樣解救呢個殘局了。

不過唔減息又唔係，布殊嘅民望已經創新低，伯南克身為布殊親自欽點官員，點都要為布殊政府打一打氣，為次按危機救救火，等布殊可以好好地做埋之後任期。

如果而家先想嚟入市，遲咗啦，而且個市場表面風光，暗藏殺機。與其和其他股民爭紅頂綠，不如留意下黃金、歐元、商品好過啦。美國減息，呢ｄ其他投資更有可為。

波圖 vs 利物浦

利物浦呢場波打得非常差，對住波圖完全唔敢進攻，交波又唔流暢，無一個球員打得出水準。不過勝在守得穩，才可以有驚無險取得一分。好彩係作客賽事，和波都無乜大問題，而且波圖係呢一組算係強隊，對出線應該無咩影響。

不過利物浦今季有一個致命的問題，就係每一場都犯一球十二嗎，再係咁唔係辦法，領隊賓尼迪斯真係要諗諗計，唔好再犯這些大意過錯。不過最大原因可能係無運，咁就真係無計了，相反曼聯就死好命，機乎每次都有幸運之神打救。就好似剛剛對愛華頓的一場比賽，成場佔不到優勢都可以勝出，真係死好命。希望利物浦比心機踢好以後的比賽，今年好有希望攞聯賽冠軍，比心機呀！

夜思

突然詩興起，作了一首詩，還望各位莫見笑。

靜夜獨自網中尋，
思君或在夢裏遊；
網中夢裏各一方，
不知相聚在何年。

淺談法家思想

先秦諸子百家中，秦皇嬴政最專崇法家，而法家的代表人物是韓非子和管仲。

以我對法家的理解，法家的基本做法就是威迫利誘。用利益引誘人去做你所想他做的事情，用懲罰恐嚇別人，令人不敢做你禁止的事情。韓非子講過，忠孝仁義在利益關係上，並不中用；而法家的治亂世、用重典，在現今司法制度上也起了顯著的作用。試問沒有法律的阻嚇，社會那有現在的太平。在戰爭的時期，沒有法治的監控，到處打家劫社，姦淫虜略；社會道德那會起到作用。

但只用法家思想也不可以，正所謂物極必反，秦始皇雖然用法家治國，一統天下。但他的皇國只有十三年壽命，就因為嚴厲的法律，對人民沒有半點慈愛之心；最後官迫民反，變成了中國歷史上第一次農民起義，做就了漢朝的誕生。

而法家思想最適用於亂世，對於那些見利忘義之徒，賞善罰惡的確可以起到顯著作用。因為人類天性傾向趨吉避凶，有利益的事情，個個也槍住去做；但如果利益需要代價，人們就會衡量利害。而大多數人都會算擇避害，除非利益非常吸引。而見利忘義的小人，特別害怕損失，而又非常貪心。所以對貪心短視的小人，我首推崇治亂世，用重典。

張學友 - 我等到花兒也謝了 (粤)

今日心情好煩燥，好想去karaoke唱這首張學友嘅“我等到花兒也謝了”

陳太參選

本來民主派和愛國派爭這個死鬼馬力留下來的立法會議值無咩野好講，因為這只不過是一個普通立法會議值，任期只得年半，象徵式意義大過真正價值。

不過陳太出來選就有故講啦。陳太一向高高在上，不食人間煙火，正宗藍血人。當年佢就係不恥老董駕空他的權力，才劈炮唔撈，題早退休。如果唔係，今日特首都有得做啦，幾時輪到矮仔曾。

今日佢放下身段，不怕比人沫黑翻舊帳，走出嚟同葉劉隻抽。而不再在五星級酒店開記招，改在小童群益會公開講話，沿途沒有人幫手擋架開路，全程一手一腳應付如狼似虎的記者，真係放下身段，走進民間的最好證明。你估放下身段好易呀！你試下做開寫字樓工，改去做地盤雜工呀，睇你適唔適應到。

點解陳太會肯走入民間，原來有原因嘅。陳太自重出江湖，又遊行，又做政改方案建議書，都無人穌佢，話佢傻嘅，個個當佢無到。當佢一出嚟話要參選，即刻有人打電話同佢傾計。你話政治係幾咁現實呢，話之你之前做到幾高嘅官都好啦，人走茶就涼；你現在無權無勢，真係睬你都傻，理得你有幾高輩份呀。

陳太今次參選，真係十拿九穩；起馬形象，同人心，都好過掃把頭多多聲。加上香港區中產智識份子居多，陳方安生嘅個金漆招牌簡直係信心保証，不如計劃下當選後嘅政治大計好過啦。

陳奕迅 - Crying in the Party

陳奕迅的一首新歌，我一聽就很喜歡，由其是黃偉文的歌詞，真的很到肉，或者我已經老了。

王菲 - 但願人長久

明 月 幾 時 有 ？ 把 酒 問 青 天 。 不 知 天 上 宮 闕 ， 今 夕 是 何 年 ？ 我 欲 乘 風 歸 去 ， 又 恐 瓊 樓 玉 宇 ， 高 處 不 勝 寒 ！ 起 舞 弄 清 影 ， 何 似 在 人 間 ？ 轉 朱 閣 ， 低 綺 戶 ， 照 無 眠 ， 不 應 有 恨 ， 何 事 長 向 別 時 圓 ？ 人 有 悲 歡 離 合 ， 月 有 陰 晴 圓 缺 ， 此 事 古 難 全 。 但 願 人 長 久 ， 千 里 共 嬋 娟 。
蘇軾‧水調歌頭

就到中秋啦，令我想起蘇軾的水調歌頭，在王菲的歌聲襯托下，份外淒美。

四季海上豪宅

今日睇報紙，現有人用郵輪建造超級豪宅，價錢由3000幾萬到3億，間隔由800尺到7000幾尺，我真係懷疑有無有錢嘅傻佬會中招。

第一，三千幾萬夠買間傳統豪宅，尺數起馬過千尺，就尺數嚟講已經唔化算。

第二，三千幾萬夠買隻私人遊艇，鍾意去邊就去邊，自由自在，唔洗要所有人同意先可以計劃行程。

第三，架郵輪日日浸係海，節舊率驚人，管理費好似要80萬到700萬到一年；一般豪宅加埋遊艇嘅管理費，都唔洗呢個數，呢個價錢，夠買架新型號benz，重要有找。

第四，亦都係最重要一點，就係豪宅最值錢嘅地方唔係夠豪華，夠派頭，而係地價。一間3000萬嘅樓，所有豪華裝修，酒店式管理，加理建築費500萬應該攪掂，仲可能有找。其他全部係地價，地價先至係豪宅最值錢嘅地方。海上豪宅何來地價，架船萬一沉咗真係純正丼錢落海了。你或者可以買保險嘅，不過無地價嘅豪宅，保費相信係天文數字。

所以呢間咁嘅海上豪宅，真係呃有錢人嘅玩意。真係有咁多閒錢，學下bill gates整過慈善基金，造福下人群好過啦。

譚詠麟 - 一生中最愛

又係我一首好鍾意嘅歌《一生中最愛》，希望大家鍾意。

對你, 我永不放棄

今日我決定咗一件事，一於好似呢首歌嘅歌名咁“我永不放棄”

扎鐵工人又攪事

今日睇新聞，班扎鐵工人見談判沒有進展，示威又無人理，又開始搵其他野攪。

佢地今日走去其他地盤試圖勸說其他工人唔好開工，但其他工人唔睬佢地，竟然強行阻止其他工人開工，被警方所阻止。

你自己要爭取加人工，要攪工人運動係你嘅事，你無理由阻止其他人工作。你有罷工自由，其他人都有開工自己，無理由你自己唔返工，就迫人陪你唔返工先得。你地無政治籌碼，無理由要強迫別人做你嘅籌碼。

其實資方已作出讓步，係你地個政棍李卓人唔肯接受，死都要企硬唔肯讓步。談判就係要每人作適當的讓步，除非你有絕對的優勢。你又無優勢，又唔係唔憂做，你地邊有條件企硬呀。

扎鐵工人們醒醒吧，人工係市場調節的，不是你話幾多就有幾多，唔好再聽個政棍老點了。佢個個月有糧出，梗係有時間陪你地玩啦；你地手停口停，你地唔食，你地屋企都要食啦。接受資方條件，回去工作吧。呢場仗，你們更本就沒有勝算。

黎明 一言為定(3G和記廣告)

黎明的第一個3G廣告。前兩年我一睇咗呢個3G廣告，馬上買咗個3G電話，諗住學黎明咁型，點知3G電話都換咗兩三部，都依然無女仔同我玩視像通話。

想你想得好孤寂

一首我舊時係karaoke必唱嘅歌：“想你想得好孤寂，我聲想你想得好痛心，向天大聲喊愛你。”

世界上最爛的中文輸入法

今日我用T9輸入法send個sms（平時我是用電腦上電話公司網站send中文sms的）。諗住send 個普通中文sms啦，已我所知，T9輸入法係跟筆劃用五個制輸入中文的。我諗住得五個制，又跟筆劃唔會好難嘅啫，而我剛剛係麥當勞用完餐，有ｄ時間就用手機send個廿個字到嘅sms啦。點知唔用由自可，一用把幾火。

我跟足筆劃法覺有ｄ字搵極都搵唔到，有ｄ打幾個筆劃又無字出，等我要諗過用第二ｄ字來代替。越打越火起，但打到一半又無理由唔打落去，用咗45分鐘時間先打到十幾個字。打到個“好”字嘅時後，我用盡方法都搵唔到個好字；重一個唔覺意send咗個未打完嘅sms出去，攪到我雞手鴨腳，最後改用英文send過個sms比個朋友補鑊。呢個英文sms，只係用咗3分鐘時間，你話係咪吹帳！

到我番到屋企，上網check番用T9個好字點打，發覺完來係唔跟筆劃，重有好多字都有特別打法，真係比佢激到扎扎跳。好心ｄ手機改用九方輸入法啦，易用又好用好多，真係佩服ｄ人用T9日日send 成幾廿個短訊。雖然我都會學曉呢個垃圾輸入法，不過為免勞氣，我都係盡量多用電腦send中文短訊好過啦。

幼稚園學論語??

今日睇星期日檔案，講香港有些幼稚園開始教中國經典，教四書五經，我覺得太急進了。

幼稚園學生連中文字都未學齊，如何學會這些深奧的文言文。你現在迫他們死記爛背，只會令他們討厭讀書，可能發揮反作用。這個年齡隨了正規的教育外，應讓他們多些集體玩樂，因為小朋友係通過遊玩來學習群體相處的方法，和發展心智。

如果你以為我反對學古文，咁又唔係喎。我本身都有看過這些經典，這些道理我認為每個人都應該學習，但我認為起馬都小三至初中才讓小孩認識這些道理。這個年紀的小朋友，開始明白事理，又係比較天真純品，開始學習專師重道，再學修身，齊家，治國，平天下。對小朋友將來成長做人會有很好的幫助。

我認為現代教育很多都只是傳授知識，對道德待人接物的教導絕無緊有。加入這些古代哲學在正規教育中，絕對對我們的下一代有心智道德上有所得益。但不要加入考試當中，因為這只會令學生死背爛背，影響了他們學習知識的興趣，應當作課外必修讀物，只需交讀書報告；這樣，學生就可以充分吸收孔子，老子思想的智識道理。

劉若英 - 後來

我將這首歌送給我曾辜負過的女孩，但願你生活得比我好吧！

無言的約會

今日同朋友講起同男仔出街，個朋友話同個男仔食餐晏晝飯，個男仔成餐飯粒聲唔出，攪到成餐飯好鬼無“引”，大家你眼望我眼，尷尷尬尬咁食完餐飯，之後分開才可以鬆一口氣；重話以後都唔會有下次。我還一起恥笑個男仔白痴，其實我舊時咪一樣，邊有資格恥笑人呀！

記得我細個果陣雖然唔係口齒伶俐，但都算得做對答如流，無論鬧交，死雞燦飯蓋，窒人，甚至呃神騙鬼，我都未驚過，爭在未曾參加辯論比賽。

但係衰在有個死穴，就係對心怡嘅女仔，就變得呆頭呆腦，成個傻仔咁。而對番其他女仔，又變得能言善辯，有講有笑。咁就死得啦，個女仔以為你對佢無意思，唔睬佢，自不然同其他人傾計啦；但係睇住個女仔同其他人傾計，重要傾到細聲講，大聲笑；真係有苦自己知呀。但當你越係想打破隔膜，個腦就硬係諗唔到講咩，就係咁，個約會完結時，唯有一個人落漠咁回家了。

可能自己當時太重得失，係個心怡嘅女仔面前，就想張自已最好嘅一面表現出嚟，唔想有任何缺憾或失儀。點知就弄巧反拙，越做越衰，唔單止自己失敗，又辜負咗個女仔一番好意。現在回想，真係少不更事，不知所謂呀。

現在人大咗，將得失唔係睇得咁重要，反而可以安然對侍所有人，唔會好似年少時咁好勝，一定要追到人為止，唔理自己的不是。可惜呢ｄ事硬係要人大咗先至領悟到，現在回頭已是百年身，當初的那個女孩現在已不知道在那裏了，如果有機會再見到佢的話，但願我有勇氣對他說一句“對不起”。

7000卡鑽石

今日睇新聞，南非發現有史以來最大粒的鑽石，原石大概有7000卡，偏綠色。

7000卡有幾大粒？大概好以一個椰子、柚子或四號足球咁大。睇完呢單新聞，我第一時間諗，咁大粒鑽石有咩用？鑽石的功能除咗可以做手飾，曬命外，重可以用嚟保值。但咁大粒鑽石肯定做唔到手飾，有邊個會拎個足球周街走，隻手唔倦咩；咁為一作用只可以擺係屋企當展覽品比人睇。

價值2億3嘅玻璃石擺係屋企，又係全世界最大，肯定威過威士忌；不過就要小心比國際大盜嚟“光顧”啦。所以起馬要請成team專業保安看日夜看守，重要買天文數字嘅保險費以防比人“撻”咗就血本無歸。要用咁多人力物力保佢安全，化唔化算就見人見智啦。不過保價能力一定大打節扣，除非呢粒水晶石可以好以豬肉價咁不斷升值啦。

用幾億用嚟威威，真係超級有錢，又夠痴線嘅大富豪嘅玩意。呢粒水晶石嘅出現，你話係你玩佢，定係佢玩你呢，真係你問我，我問邊個了。

恆指直衝25000點？

四叔話恆指直衝25000點，股市將再展牛市。係咪真係咁好景？我就唔係咁睇好了。

現在市場熱炒“炒股資金自由行”，但係上面ｄ錢都未落到香港，港股已經興奮到兩個禮拜由低位直破高位，所有股票炒到高晒，係咪真係有國內水魚落尼到我地接火棒？

傳統別智慧告訴我地，別人貪心時我恐慌，別人恐慌時我進取。現在我覺得是時侯收手了，短時間內升成3000點，我相信調整又差不多又開始了，就算股市唔跌又再升，呢ｄ錢都係留比別人賺啦。

另外我有朋友成日同我題住港交所﹝388﹞，我覺得港交所差不多到頂了。點解？雖然港交所係獨市生意，係畢非特所講《monopoly》嘅股票。但係差不多所有上市嘅股票都係中國公司和國企，中國公司已有蹟像返回A股市場上市，國外公司很少會選擇香港上市，連李嘉誠都話好有可能係國內找機會上市，所以我覺得港交所嘅好景都差不多夕陽了。

所以與其買入一間沒有水流入的水塘公司，我不如買入如日方中，同樣係做獨市生意嘅中移動﹝941﹞同中國人壽﹝2628﹞。當然係睇位入啦，現時就唔建議高追了。

追 (電影版) 張國榮

“有了你即使平凡卻最重要。”張國榮的《追》，你的這一生又追求些甚麼呢？

九歲大學生

今日睇新聞，九歲神童入浸會大學，我睇到之後覺得將會係一個悲劇。並唔係我妒忌佢咁有天份，可以咁早入大學；而係一個咁天真無邪嘅小童，就IQ爆鵬，但心智始終係一個小朋友，這個年齡的小童，應該和一個同齡的小童一起玩樂成長。你要帶他走入一個青少年的世界，大家生活方式不一樣，追求都不一樣，你叫他如何合群，如何交朋結友。你或者會話，佢只係讀書啫，何以唔理其他人。咁你叫佢平時課餘時間怎樣過，大學一個星返廿個鐘上堂時間，其他時間你叫佢如何自處，唔通不停溫書咩，遲早會變得自閉古怪，破壞了一個兒童童年時光。老實講，人生最快樂就係童年，無機心，思想簡單，想食就食，想玩就玩。所以話天才都唔係一種恩賜。

我細個果陣好羡慕ｄ天才，得天獨厚，唔洗點讀書就乜都識晒。但到人大咗，覺得唔係天才先至係恩賜。天才通常無咩好結果，除咗有一陣虛榮感外，每日嘅壓力都好大，好似愛恩斯坦係實驗室渡過一生，最後重痴埋線。莫扎特過唔到30歲，貝多芬天生係聾嘅，重有好多天才，佢地嘅心智發展都唔係咁如意，有好多都屈屈而終。所以中庸之道最好，永遠唔好做最極端果個。正所謂槍打出頭鳥，唔好做太多引人注目嘅事；如果想上位，只要集中做好手上的事情就可以了，大巧不如拙誠，與其做咁多哇眾取寵的事，不如好好做好自己的本份啦，大家話係咪。

楊千嬅 - 每當變幻時

剛剛睇完電影“每當變幻時”，時間變遷真係快，回歸又十年了，我們身邊的事物又變了幾多呢？

人世多途

一個blogger的文章，覺得故事不錯，和大家分享下。

一個年輕人去拜訪一位大師,向他請教為人處世之道,大師給他講了三個故事。第一個故事:從前有兩個強壯的青年,一拙,一巧。 兩人奉命在同一塊地上各自挖井找水,很快兩人都挖了兩米深,但絲毫沒有水的跡象。拙者繼續在原地深挖,而巧者則換了個地方作新的嘗試。終於拙者通過不懈的努力找到了汩汩的源泉,而巧者雖然不斷地更換地方,終究還是一無所獲。年輕人聽罷,若有所悟地點點頭:“我明白,做人就應該持之以恆,不應該朝三暮四,蜻蜓點水,否則終將一事無成。”大師只是笑笑。

第二個故事:還是這兩個人,巧者在經過數次的嘗試後,終於在一個地方發現的有水的跡象,於是深挖,最終找到水源。而拙者始終在原地,一如既往,埋頭苦幹,越挖越深,結果雖然付出了很多卻始終沒有找到水源。“這？”年輕人有些遲疑,“我想也許人還應該不斷地總結經驗,不斷地嘗試最適合自己的生存環境,而不應該刻板教條,更不應該執迷不悟。”大師還只是笑笑。

第三個故事:兩個人雖然都竭盡全力,但無論拙者挖多深,也無論巧者換多少地方,兩個人都沒有能找到水源。“為什麼？”年輕人疑惑起來,“那做人還有準則嗎？”“因為這個地方可能根本就沒有水。”大師從容道,“其實為人也是如此,生活中沒有一成不變的處世原則,一切都要靠自己去摸索和體味。”

股市真係唔知點睇

昨日祖國實施准許內地資金自由行，令股市急升過千點；今日又上多1000多點，但之後急轉值下，升幅收窄至133點。

正奇怪做咩突然跌得咁急，原來春江鴨知道中國午後會加息，及早走人。人民銀行在收市後宣佈加息0.27厘至3.6厘。明日應該又跌過，市況波動，大起大落，真係心血少ｄ都玩死。

真咁動盪嘅時世，都係平常心對待啦，股市起跌乃平常事，唔做槓桿，唔做投機，自然心安理得了。

劉德華 - 常言道

『得失只一念　風景不轉心境轉
煩惱來自偏執一切也依戀
風吹草動　命途亂了我不亂
交出了平常心　再隨緣』

佛家有云，人生有三苦，貪、瞋、痴，我們就暫時放下執念，聽一聽歌吧！

唔好人講咩你信咩

呢個世界滿佈謊言，無論政府、電視、名人、甚至宗教；都未必句句屬實，要自己獨立思考，分別是非，不要做個人講咩你信咩嘅笨蛋。

調整雖完成，但不代表升市重臨。

今日恆指差不多直線上升，收市指數直上21595點，上升了1208點，和上星期五跌過1200點相影成趣，但後市只會係上落市，並不是另一個大升市開始。

上星期五，美國聯儲局減貼現利率，只能穩定健康金融機構的資金供應，但並不能解決次按債券問題。美國聯儲局成立目的是穩定經濟、貨幣政策和通漲，並不是保証股市昌旺。如果不是次按債劵問題會影響金融系統，實施自由市場的聯儲局絕不會出手減貼現率救市，因為減息可能會引起通漲和美元信心動搖的問題。

這次聯儲局出手，証明次按問題已威脅到經濟可能引至衰退。因此次按責劵問題有機會越演越烈，最後影響有幾大無人知道，不過有這個陰影存在，股票市場想大升都好難；加上市場銀根收窄，實在看不到市場重展升軌的可能。

不過港股市場大部份根隨中國經濟盛衰，加上大部份藍籌股市盈率正常，因此在低位買入藍籌例如、中移動、中國人壽．．．等等，絕對是投資時機。

以上只是我個人睇法，請各下自行分析。

低水平的英超聯球證

今場利物浦同車路士的對賽原本非常精彩，但個球證執法水準真的令人氣憤。不在適當時間比牌，應比罰球不比，離球唔夠十碼又唔吹；咁低水準嘅球證，竟然可以吹場咁重要嘅比賽。攪到球員機乎打交，由其是個十二碼，咁近都睇唔到係普通碰撞，竟然比點球，真係睇到眼火爆。

其實英超球證低水平，已不是第一日嘅現像；英超聯球賽越來越受歡迎，轉播費又越收越貴，球證水準再長始低落下去，遲早被其他國家聯賽追上，到時真係究由自取，唔好怪人唔睇你個聯賽。

老實講，身為一個利物浦擁護者，看完今場對車路士的球賽，表現非常之對版。成場打到車路士無還手之力，場場有咁嘅水準，重奪英超冠軍真係指日可待，賓尼迪斯，我對你有信心，等睇你捧冠軍獎杯！

可憐的小馬哥

馬英九可說是台灣難得一見的清泉，竟然比屈貪污，濫用特別費，可說是指鹿為馬，生安白造。特別費是傳自國民黨時代的遺留政策，是幫補低微的人工，防止貪污的一種養廉金（雖然一樣貪污）；基本上個個政黨官員都有攞，但係係得佢比人話貪污，你話台灣政治幾咁黑暗呢！

而家告佢唔入（緊佢告唔入啦，唔通你告晒所有政府官員），都要上訴攪到你永無寧日。民進黨真係專攪抹黑、陰謀的小動作。我一直覺得小馬哥不適合台灣的政治環境，一個溫文意雅的君子，點會係奸狡的政客對手；所以我唔睇好馬英九下年選舉總統。我唔係幾信一個文弱書生可以以一己之力，可以改變整個台灣的選舉生態。你睇陳水扁扮中槍，博同情，又全國倒扁都賴死唔走就知道班政棍幾咁老奸巨惑。小馬哥，你要選總統之路唔易行㗎，有班你涯呀。

傾心

又係一首我好鍾意嘅歌“傾心”。

調整結束，分段吸納。

今日恆指曾經跌超過1200點，跌至19500水平，之後急劇反彈至20387收市，加上美國減貼現率*50個點子到5.75厘。初步觀察，調整經已完成；建議分段吸納藍籌實力股，如中移動、中國人壽…等等。


*貼現率是中央銀行借錢給商業銀行的利率，與聯邦基金利率不同，聯邦基金利率是美國銀行間的隔夜拆款利率，代表的是短期市場利率標準。

扎鐵工人罷工

呢班扎鐵工人簡直離譜，話要將日薪加至９５０元每日和減工作時間，又話９７年日薪有１２００元每日，經濟好返，要求加人工。重要影響其他市民，阻塞交通，不理他人死活，只為他們要加人工。

荒天下之大謬，從來薪酬都是市場來定，人工從來都係由供求，和技術資歷來定立，那有走出來示威要求加薪的道理。你認為人工低，大可以不做，另謀高就。個個話自己人工低都走出來示威，香港陸沉都有之。

用９７年人工來比較，邊個唔知９７年人人豐衣足食，個個有樓都係百萬富翁，年年加人工，炒炒賣賣都可以過活。但現在點可以和９７年比，有邊個打工仔人工可比美９７果時，有邊個唔係比當年做得辛苦。唔通個個走出嚟示威，要求人工加到９７年水平啦喎。你又唔用７９年果年人工來比較。

由其是果個李卓人，次次都出嚟攪事，明知班扎鐵工人理虧，還要線動工人到中環阻塞交通，影響別人來增加自己政治籌碼，這種損人利己，不理市民的行為，簡直令人齒冷。呢ｄ政棍，為恐天下不亂，為蒙騙選民的選票，專做這些損害杜會的事，簡直係社會嘅害蟲。

我認為政府不應讓步，不可以助長這些不合理行為，否則後果只會令更多人出來無理示威，危害杜會安定。

劉德華 - 心只有你

我很喜歡這首歌，今日重聽和大家一起分享『回頭便知，我心只有你，沿途路斜，愛卻在原地。』

英超聯開鑼

等咗一個夏天，英超聯終於開波啦。今年我嘅愛隊利物浦加多咗幾個新人，有費蘭度托里斯、賴思巴布、班拿約和其他幾個新球員；老實講，我對新加盟的球員表現唔覺得有咩驚喜，不過我對領隊賓尼迪斯有信心，舊時果隊二線兵團都可以奪歐聯冠軍；今年加多咗咁多有質數嘅新兵，奪取英超聯冠軍有望了。雖然今年利物浦實力加強咗，但係今年其他各隊嘅平均實力也增加不少（因為多咗好多富豪入主英超球隊，大量注資。）所以今年英超聯冠軍爭奪，比以往困難，由其是曼聯和車路士。但我點會希望我愛隊今年能奪得英超聯冠軍，以重震這支往日英國球壇霸主的威風。

回馬颱風

真係八十歲未死都有新聞聽呀，颱風“帕布 ”略過香港後，可能唔記得買手信，竟然轉個急彎回港探親；令到香港今年掛第一個八號風球。
但香港天文台真係好野，時間較得唔會遲唔會早，時間啱啱好；等Ｄ打工仔，食完晝，返到公司先至八號。攪到Ｄ打工仔剛剛開工，Ｄ工作做到一半，要做埋Ｄ手尾，加上老闆乘機叫Ｄ伙計剛剛番到嚟，避下雨先；老細叫到，邊個敢走先，結果個個無四點都無得走人。
放早２個鐘，Ｄ打工仔有得早走，Ｄ老闆又唔會嘈天文台咁快掛風，又唔多影響香港生產力，真係一舉三得，包保無人會嘈，呢次天文台長真係學“精”咗，有進步。

莊子初讀

今天看"香港討論區"，看見有一位讀者說對莊子的見解，他看的《漫畫莊子》和《道德經》我也看過，覺得他寫得很不錯，特別節錄下來給大家品嚐。之於我對﹝老、莊﹞學說的看法，有機會再寫下來和大家研究。

節錄如下：

莊子初讀　by bluesix

今日借左本蔡志忠的《漫畫莊子》返來, 發覺入面講的比中庸之道更有價值的東西....莊子的智慧, 首次接觸, 他的智慧是有老子般高深,所謂莊老莊老, 就是指老子和莊子, 人們將他們擺在一起, 是因為他們的哲學有很多共同之處, 都是道家代表人物. 老子講道法自然,莊子也講順應自然, 順應天道. 人要隨自然, 死亦隨自然. 西方就是從二元對立的邏輯關係出發, 現今把大自然破壞得千瘡百孔,國家內外戰爭頻繁, 遲早把自己也對立掉...例如鋒芒太露, 必遭人忌, 意氣風發, 必遭人殃. 不招人妒是庸才.莊子用了很多則故事去說明這個做人道理, 最簡單的莫過於「有用」及「無用」的說明, 一顆樹若是有用, 那它遲早被人砍了去做柴,反而一個被人認為「無用」的樹, 但因為沒人理會, 逃過大劫, 此乃「無用之有用」. 所以, 人生在世, 總會憂慮自己知道太少, 享受太少,所得太少, 但那往往是冥冥中的一種福分, 天知道!? 萬物都有兩面的對立, 其價值的好壞, 取決於如何權衝. 鵝的頸很長,腳卻短, ''確''的頸好短, 腳卻長,兩者互不笑對方, 兩者各有長處, 都是為了捕魚的方便. 白鴿無需笑烏鴉, 烏鴉無需羨白鴿, 黑與白,是自然存在的東西, 不要強加分化和對立. 兩腳小動物不用羨慕百足蟲, 因為蛇沒有足但行得更快, 這些都是很自然的東西. 人聲樂聲歌聲,都勝不過自然之聲, 天地萬賴皆有聲, 細心傾聽自逍遙. 給大雁奏美麗的音樂, 大雁可能不出幾天便死掉了, 因為它不適合人造的環境.一切應自然, 勉強乃破壞...莊子的哲學, 與西方哲學有不少共同之處, 其鼎鼎大名的「莊周夢蝶」 ,就是與笛卡爾著名的的「夢的假說」有異曲同工之妙, 都旨在懷疑「究竟人是不是活在一個夢里」. 莊子的「子非魚, 焉知魚之樂」,也是西方知識論論證關係的一種直接的說明. 莊子的另一則故事, 是說一個打造車輪的匠工向一位皇帝說「讀了前人的東西, 也不會完全明白前人的功夫或思想」, 這也與解構主義文學所說的「延異」和「誤讀」概念完全相同, 真的很了不起. 另外,他所主張的「沒人能在爭論中勝出, 就算你嬴了, 你還是輸了」, 與最著名的人際大師卡耐基所說的「你不可能在辯論中勝出」完全是一樣,不知是不是卡耐基學習莊子的智慧呢...另外, 莊子用影子故事說明人應超出知識的侷限, 與西方後現代文化對純粹科學主義的批判和對形上學的回歸訴求基本上是同一個理念的,「工具/科學知識」不是最偉大的, 順應自然才是道之所在...除了這些共同點, 應該還有更多...
《道德經》是繼聖經後全球銷量最多的書籍, 老子的智慧值得肯定,連美國和台灣等國家總統也要讀, 大企業更派發道德經給員工. 莊老是中國哲學的偉大根基, 幾千年來價值永存, 歷練多少世紀,證明價值非凡...每一位追求處世智慧的人, 請不要被西方的工具理性或泛科學人文知識蒙昧了頭腦, 以為資本主義下的工具知識是最大的智慧, 錯了,那只會令人更愚昧更無知. 對此沒有了解的人, 還以為西方精神是偉大的, 殊不知那些理性中心主義、霸權主義、工具主義、單邊主義和資本主義,在後現代已被文人批判得體無完膚, 這只是因為沒有人留意這方面的資訊而已, 若要搜索, 大家可能要驚訝, 原來這方面的批判是如此之多... 其實, 最早的智慧, 早就出現在中國, 那就是莊老的哲慧了...最可愛的是, 老子和莊子的哲學, 往往在幾千年前與廿一世紀後現代主義的竟有相通之處, 這不叫人感到驚喜嗎, 關於莊子的智慧, 遲下再分享, 的確有很多智慧要從他身上吸取...

凍飲加3蚊

這個夏天因為人民幣升值，加上食品價格通貨膨脹，再加上餐廳乘機加價；所以我們外出用餐，特別在快餐店和茶餐廳，如有留意價錢的話，大家應該會留意到，價錢已加上一元或以上。
食品加價，不理是通脹還是乘機博懵，我們都要無可選擇地接受，除非你唔出街食飯；但凍飲加３蚊就令人覺得離譜，同埋有方法可以唔比。
基本上凍飲加２蚊已有幾十年歷史，已廣為大眾接受，但最近本地餐廳竟然想變本加厲，加到３蚊，一加就加５０％，加幅驚人，我就唔明他們有咩野理據去加咁多。
大家都知凍飲成份最多係冰，冰係用水做的，唔通水費加咗好多，以我所知，近年水費無咩增加，另外冰多飲品少，沖淡晒杯凍飲，係人所共知的惡行（麥當奴由其過份，唔比人凍飲走冰，明呃！）。現還要加到３蚊，真係同我地銀包過唔去。
但你有張良計，我有過長梯，見招拆招；我見方間已有唔少人改飲熱飲，熱辣辣都唔益你地Ｄ奸商，反正有冷氣都唔會好惡頂；如果真係想飲凍飲，可轉飲凍汽水，怕肥可以飲凍健怡可樂；一樣唔洗加３蚊，問你死未。
以上純粹講下笑，同大家在炎炎夏日，加一點調劑，以博大家一笑。
＾＿＾

中國足球

今日睇咗中國對北韓果場波，二個字可以形容晒“屎波”。
我只係睇咗下半場，無論組織，交傳，技術，同埋門，無一樣做得好；頭鎚可以交咗比人，交波一係交唔到，一係就接應果個接唔到，埋門又唔夠人，只係識得亂咁斬入禁區，又唔睇有無人接應，求其斬入禁區當交功差。
個足球評術員重話中國奧運目標要起馬八強，四強為之滿意。
我話比你入到決賽週都金豬還神啦，重話要幾多強；我好少睇中國足球，一睇之下仲差過香港南華隊；算數，都係睇番英超聯罷啦。

香港的裝修工程工作者,操守真係唔掂!!

今日我屋企換鋁窗連冷氣機，鋁窗公司來了兩個工人(其中一個係老細）。由於屋企無人得閒，我唯有親自上馬，招呼呢兩位師夫。點知道對住佢地，真令我對裝修工人待客之道“嘆為觀止”。


他們一入到嚟我屋企，見到我屋企部舊冷氣機，就問我部冷氣機係咪唔要，我答佢我要返（我媽咪話賣比收買佬）。佢地即時變臉，又話叫咗車，又話唔洗拎部舊機走，佢唔洗要兩個人嚟，浪費多一個工人錢，我即時回話，你地一個可以換鋁窗冷氣咁利害，佢地無答我（當我傻㗎，一個人起樓呀“笨”）之後工人甲（係老細）同工人乙講，部舊機裝去別墅掛，工人乙答，可能裝去比華利山呢！（串到呀！）


之後還有更差的說話，以下係我地嘅精彩對答

工人甲講，你屋企有無３００呎呀，實唔實用呀？（盲到見到我屋企點止３００呎呀，想吋我屋企細啫）我即時回話，點止３００呎呀，實用過ｄ新樓。

工人甲又問，你部舊冷氣拎去邊到用呀（重死心不息），我答，我呀媽話比朋友卦。

工人甲又講，你部新冷氣買咗幾多錢呀（我都費事答佢），我說，我呀媽買，我唔知。

工人甲夠膽死講，你呀媽都幾錫你喎，買部冷氣你嘆。我即時講，擺係個廳，都唔會一個人用呀嘛。

工人甲繼續講，咁大個仔，都咩唔出錢買孝順下呀媽呀（處處迫人，我索性點佢），我答，我仲讀緊書嘛，邊有錢買呀！（明點你呀，吹咩！）

工人甲死死氣講，讀緊書就無辦法。

佢仲唔死心，問我係咪講緊大學，我答，係呀城大。

佢又問，係邊呀，我開始唔耐煩，答九龍塘呀！！

佢話，咁我唔知係邊到嘛，咁多間大學．．．大家開始沉默。

之後佢地依然奮奮不平，二條友自己傾計，無再睬我，我就牛咁眼“及”住佢地，睇佢地有無攪破壞。


現時ｄ裝修工人ｄ態度真係唔要得，ｄ舊冷氣機係ｂｏｎｕｓ，我有權唔比你，我比足你人工，你咁嘅態度，如果唔係個工程做緊，我即時踢佢地走，不過都唔洗指意會有下一次。

我的blog正式開張

今日恆指跌咗729.58點，但一樣無阻礙到我開blog嘅心情。其實呢個blog係我比人局我開嘅，不過可能每件偉大嘅事情都係迫出嚟，既然個blog都開咗啦，我就本住毛澤東精神，為人民服務，盡努力update個blog。不過呢個係web2.0嘅世代，希望各位叔伯兄弟得閒就留言或者“提點”下小弟，等小第可以與時並進，做到最好，多謝各位。